Apple iOS 26: телефоныңызға қандай жаңа мүмкіндіктер келді?

iOS 26 қашан шығатыны жайлы пікірталастар соңғы алты ай бойы жалғасып келді. Көптеген қолданушылар «шыны тәрізді» интерфейсті ертерек көру үшін тіпті бета-нұсқасын орнатып үлгерді. Apple iOS 26 ресми шығу күнін 15 қыркүйек деп жариялады – енді iPhone иелері жүйенің жаңа мүмкіндіктерімен танысып жатыр. 

Көрнекі жаңалықтар 

Жүйедегі ең көзге түсетін әрі ең көп талқыланған өзгеріс – Liquid Glass әсері. Жарық интерфейс элементтерінен нақты уақытта сыналып, шағылысып, ең маңызды ақпаратты ерекшелеп көрсетеді. 

Басқа көрнекі өзгерістер: 

• құлыпталған экрандағы сағат түсі фон мен хабарландыруларға бейімделіп өзгереді; 

• 3D әсерлі тұсқағаздар кез келген суретті кеңістіктік көрініске айналдырады; 

• музыкалық альбомдардың қаптамасы анимацияланған, ал кейбір орындаушылар толық экранды анимацияларды өздері қосады. 

Барлық таңбашалар да «шыныдай» болып өзгерді. Оларды әртүрлі реңктерге баптауға немесе мөлдір түсті қолдануға болады. 

Жаңартылған камера 

Камера қосымшасының көрінісі өзгерді – енді экранда тек екі түсіру тәртібі көрсетіледі: фото және бейне. Қалған баптаулар осының артында жасырылған, оларды ашу үшін саусақты солға не оңға сырғыту жеткілікті. Айта кетсек, iOS 26 жаңартуы жанама түрде болса да суреттер сапасын арттырады. iPhone 15 және одан жаңа үлгілерде объектив ластанса, жүйе сенсорды сүрту қажеттігін ескертеді. 

Бұрын камераны Apple ақылды сағаттары арқылы басқаруға болатын, енді бұл тізімге AirPods 4, AirPods Pro 2 және олардың жаңа үлгілері қосылды. Олар жаңа қимылды таниды: бейне түсіруді бастау немесе суретке түсіру үшін сабағын басу жеткілікті. 

Галереяда да өзгерістер бар. Енді кітапхана мен коллекциялар бөлек қойындыларға бөлінген – мұрағаттан суреттерді табу әлдеқайда оңай болды. Коллекцияларды орындарын ауыстыруға, жасыруға және көрінісін өзгертуге болады. 

Ата-ана бақылауы 

iOS 26-ны қазір қотарып алудың тағы бір себебі – кеңейтілген ата-ана қадағалауы. Балалар жаңа немесе белгісіз нөмірге хабарласқысы келсе, ата-анасына сұрау жібере алады. Хабарламаларда және FaceTime қоңырауларында телефон бейәдеп мазмұнды таниды да, оны бұғаттайды. 

Сонымен қатар, қосымшалар мен сервистер жас ерекшелігіне сай мазмұн ұсынуы үшін ата-аналар балалардың шамамен жасын сыртқы әзірлеушілерге жіберуге рұқсат бере алады. Бұрын қауіпсіздік мақсатында бұл мүмкіндік шектелген еді. 

Жасанды интеллект 

Apple Intelligence жетілдіріліп, телефонның негізгі функцияларымен тереңірек біріктірілді. Пайдалы жаңалықтар: 

• Live Translation – хабарламалардағы автоматты аударма, FaceTime қоңырауларында субтитрлер; 

• AirPods арқылы аударма – сөзді шынайы дауысқа ұқсатып бірден аудару (AirPods 4 (ANC), AirPods Pro 2, AirPods Pro 3 және iPhone 15 Pro-дан бастап қолжетімді); 

• Image Playground және Genmoji – өз суреттеріңіз бен эмодзилеріңізді жасауға мүмкіндік; 

• Visual Intelligence – сурет арқылы іздеу, күнтізбеге оқиғаларды қосу және сұрақтарды экраннан тікелей қою. 

«Жылдам командаларда» да жасанды интеллект қолдануға болады: сурет жасау, мәтінді қысқаша мазмұндау, күнделікті әрекеттерді автоматтандыру. Бірақ бұл функциялардың қолжетімділігі құрылғы моделіне, елге және тіл нұсқасына байланысты. 

Қоңыраулар мен хабарламалар 

Телефон хабарламаларды автоматты түрде сұрыптайды – белгісіз нөмірден келген қысқа хабарламалар бөлек қалтаға жіберіледі. 

Чаттарды даралаудың жаңа тәсілдері: 

• барлық қатысушыларға қолжетімді ерекше фондар (оның ішінде өз суреттеріңізден жасалған); 

• топтарда тез ортақ шешімге келу үшін сауалнамалар; 

• әңгімелесушілердің белсенділігін көру үшін хабарлама теріп жатқанын көрсететін индикаторлар. 

Белгісіз нөмірлерден қоңыраулар да сүзгіден өтеді. Жүйе қоңырауды қабылдап, қоңырау шалушының аты мен себебін анықтайды, содан кейін ақпаратты сізге көрсетеді – қабылдау не қабылдамау шешімі өзіңізге байланысты. 

Басқа мүмкіндіктер 

Жүйедегі жаңартулар дерлік барлығына әсер етті. Солардың бірнешеуіне тоқталайық: 

• «Карталар» енді бағыттарды сақтап, жолдағы кептелістер жайлы хабарлайды; 

• AutoMix бірнеше әуенді автоматты түрде қосып ойнатады; 

• Tapback көмегімен көлікте келе жатып хабарламаларға жылдам жауап қайтаруға болады; 

• жаңа «Қарап шығу» қосымшасы PDF құжаттарымен жұмыс істеуді жеңілдетеді (онда сканерлеу де, автоматты толтыру мүмкіндігі де бар). 

Егер жүйе (iPhone 15 Pro және одан кейінгі үлгілерде) аккумулятордың күні бойына жетпейтінін байқаса, бейімделген энергия үнемдеу тәртібін іске қосады. Мысалы, егер сіз көбіне үйге 19:00-де оралатын болсаңыз, телефон мұны ескеріп, ресурстарды соған сай реттейді. 

iOS 26: қай iPhone-ға жаңарту шықты және нені білу керек? 

Соңғы жарты жылда талқыланған тағы бір мәселе – қай iPhone үлгілеріне iOS 26 орнатуға болады? Apple жаңартуды iPhone 11-ден бастап барлық смартфондарға қолжетімді етті. Алайда кейбір мүмкіндіктер үлгіге байланысты әртүрлі болуы мүмкін – толық ақпаратты Apple анықтамасынан көруге болады. 

iOS 26-дағы барлық жаңартулардың шығу күнін компания бөлек хабарлап отырады. Сондықтан кейінгі жаңартуларды елемеңіз: олар ұсақ қателерді түзетіп, жүйенің жұмысын жақсартады. 

Қорытынды 

Бұрын бәрі iOS 26-ның қашан шығатынын талқыласа, қазір бизнес өкілдері кімнің «шыныдай» дизайны өзгеше екенін жарысуда – Apple цифрлық әлемде жаңа үрдіс қалыптастырды. Барлық жаңартулар сіздің қолдану тәжірибеңізді қызығырақ етеді – маңыздыға екпін түсіретін Liquid Glass әсерінен бастап жаңа аударма мүмкіндіктеріне дейін. 

Егер ОС-ты жаңартуда қиындықтар туындаса, Қазақстандағы iSpace дүкендеріндегі мамандарымызға жүгініңіз. Айтпақшы, дәл осы жерде соңғы смартфон үлгілерін қолыңызбен сынап көріп, iOS 26-ның оларда қалай жұмыс істейтінін байқай аласыз. Ал егер құрылғыңызды жаңартқыңыз келсе, бізде төлем жасаудың бірнеше тәсілі бар, соның ішінде Trade-in бағдарламасы да бар. 

Сондай-ақ оқыңыз 

iSpace Apple Premium Partner дүкендеріндегі trade-in

Apple техниканы қай жерден сатып алған дұрыс және IMEI iPhone туралы не білуіңіз керек?

Apple компаниясы 2025 жылдың басты презентациясында не таныстырды?

iPhone оқу тиімділігін қалай арттырады: оқушылар мен студенттерге арналған 7 лайфхак

iPhone-ды қалай дұрыс таңдауға болады? Сатып алушыларға арналған толық гайд