iCloud-тағы фотосуреттер: фотосуреттерді iCloud-қа қалай жүктеп, iPhone жадынан орын босатуға болады

Кейде iPhone құрылғысының ішкі жадында бос орын қалмайды. Мұндай жағдайда iCloud көмектеседі. Фотосуреттерді бұлттық қоймаға жүктеу үшін «Параметрлер» бөлімін ашып, экранның жоғарғы жағындағы атыңызды түртіңіз. Одан кейін iCloud бөлімін ашып, «Фотосуреттер» бөліміне өтіп, «Осы iPhone құрылғысын синхрондау» параметрін қосыңыз. Фотосуреттер бұлттық қоймада сақталуы үшін «iCloud фотосуреттері» функциясы қосулы тұруы керек. Ал құрылғы жадынан орын босату үшін «iPhone жадын оңтайландыру» параметрін таңдаңыз.

Төменде фотосуреттерді iCloud-та сақтау, синхрондауды дұрыс баптау және смартфон жадынан көбірек орын босату жолдарын қарастырамыз. Қандай да бір қиындық туындаса, iSpace мамандары қажетті функцияларды баптауға әрдайым көмектеседі.

«iCloud фотосуреттері» функциясы қалай жұмыс істейді?

«iCloud фотосуреттері» – фотосуреттер мен бейнелерді әртүрлі құрылғылар арасында синхрондауға арналған бұлттық қызмет. Файлдар жүктелгеннен кейін оларды iPhone, iPad және Mac құрылғыларынан, сондай-ақ iCloud веб-сайтынан ашуға болады. Ол үшін барлық құрылғыда бір Apple есептік жазбасына кіру жеткілікті.

Фотосуреттер мен бейнелерге енгізілген өзгерістер барлық құрылғыда автоматты түрде көрсетіледі. Мысалы, фотосуретті қиып, контрастын өзгертсеңіз немесе файлды жойсаңыз, бұл өзгерістер басқа құрылғыларда да көрінеді.

Фотосуреттерді iPhone құрылғысынан iCloud-қа қалай жүктеуге болады?

Функцияны баптау үшін тұрақты интернет байланысы мен Apple есептік жазбасы қажет. Фотосуреттерді iCloud-қа жүктеу тәртібі:

1. iPhone құрылғысындағы «Параметрлер» бөлімін ашыңыз.
2. Apple есептік жазбасының параметрлеріне өту үшін экранның жоғарғы жағындағы атыңызды түртіңіз.
3. «iCloud» бөлімін ашыңыз.
4. «Фотосуреттер» тармағын таңдаңыз.
5. «Осы iPhone құрылғысын синхрондау» параметрін қосыңыз.

Осыдан кейін фотосуреттер мен бейнелер бұлттық қоймаға бастапқы сапада автоматты түрде жүктеле бастайды. Жүктеу толық аяқталғанша синхрондауды тоқтатпаңыз. Деректер көлемі үлкен болса, смартфонды қуат көзіне қосып, Wi-Fi желісіне жалғаған жөн.

Фотосуреттерді iPhone құрылғысынан бұлттық қоймаға не үшін жүктеу керек?

Жиі фотосурет түсіріп, бейне жазатын болсаңыз, бұлттық қойма әсіресе пайдалы. Оның пайдасы сапарға шыққанда, демалыста және мереке күндері ерекше байқалады. Жадтағы бос орынның қалай таусылғанын байқамай қалуыңыз мүмкін: кеше ғана орын жеткілікті болғанымен, бүгін жағажайда түсірілген бейнені, әуежайдағы кадрларды немесе бірнеше ондаған селфиді сақтайтын орын қалмауы ықтимал. Фотосуреттерді бұлттық қоймаға жүктеудің артықшылықтары:

• смартфонды жоғалтып алсаңыз да, барлық фотосуретіңіз бен бейнеңіз iCloud-та сақталады;
• құрылғының ішкі жадында көбірек бос орын қалады;
• фотосуреттер мен бейнелерді басқа адамдармен бөлісу оңай болады.

Бұлттық қойма жаңа iPhone құрылғысына ауысқан кезде де пайдалы. Файлдарды қолмен көшірудің қажеті жоқ. Apple есептік жазбаңызға кіріп, синхрондауды қоссаңыз, барлық фотосурет пен бейне жаңа құрылғыда автоматты түрде пайда болады.

Бұлттық қойманың көмегімен телефон жадынан қалай орын босатуға болады?

Смартфон жадынан орын босатуға «iPhone жадын оңтайландыру» функциясы көмектеседі. Бұл функция қосылған кезде фотосуреттер мен бейнелердің түпнұсқалары бұлттық қоймаға жүктеледі, ал құрылғыда олардың аз орын алатын нұсқалары сақталады. Файлды ашқанда, өңдегенде немесе жібергенде, оның толық өлшемді нұсқасы iPhone құрылғысына автоматты түрде жүктеледі. «iPhone жадын оңтайландыру» параметрін қосу тәртібі:

1. iPhone құрылғысындағы «Параметрлер» бөлімін ашыңыз.
2. Экранның жоғарғы жағындағы атыңызды түртіңіз.
3. iCloud бөлімін ашып, «Фотосуреттер» бөліміне өтіңіз.
4. «iPhone жадын оңтайландыру» параметрін таңдаңыз.

Синхрондау ұзақтығы фотосуреттер мен бейнелердің жалпы көлеміне, сондай-ақ интернет жылдамдығына байланысты.

Фотосуреттерді iPhone құрылғысынан өшірмей, iCloud-тан қалай жоюға болады?

iCloud-пен синхрондау қосулы болса, фотосуреттерді «Фотосуреттер» қолданбасы арқылы жоймаңыз. Олар смартфоннан ғана емес, бұлттық қоймадан және сол есептік жазбаға қосылған басқа құрылғылардан да өшіріледі. Файлдарды iCloud-тан жойып, iPhone құрылғысында сақтау үшін алдымен синхрондауды өшіру керек. Әрекеттер реті:

1. «Параметрлер» бөлімін ашып, экранның жоғарғы жағындағы атыңызды түртіңіз.
2. iCloud бөлімін ашып, «Фотосуреттер» бөліміне өтіңіз.
3. «Осы iPhone құрылғысын синхрондау» параметрін өшіріңіз.
4. Құрылғыда сақталмаған түпнұсқаларды жүктеу үшін «Фотосуреттер мен бейнелерді жүктеп алу» тармағын таңдаңыз.
5. Жүктеу аяқталғанша күтіп, барлық фотосурет пен бейненің құрылғыда сақталғанын тексеріңіз.
6. Содан кейін iCloud веб-сайтын ашып, қажетсіз файлдарды сол жерден жойыңыз.

Ескеріңіз: «iPhone жадын оңтайландыру» параметрі қосулы болса, құрылғыда файлдардың тек аз орын алатын нұсқалары сақталуы мүмкін. Сондықтан бұлттық қойманы тазаламас бұрын барлық түпнұсқаны міндетті түрде iPhone жадына жүктеп алыңыз.

Фотосуреттерді iCloud-пен синхрондауды өшірсеңіз, не болады?

Синхрондауды өшіргеннен кейін iPhone құрылғысы iCloud-пен дерек алмасуды тоқтатады. Жаңа фотосуреттер мен бейнелер бұлттық қоймаға жүктелмейді, ал кейін енгізілген өзгерістер тек осы құрылғыда сақталады. Бұрын синхрондалған файлдар iCloud-та қала береді.

Функцияны өшірген кезде iPhone фотосуреттер мен бейнелерге қатысты қандай әрекет жасау керектігін сұрайды. «Фотосуреттер мен бейнелерді жүктеп алу» тармағын таңдасаңыз, смартфон толық өлшемді түпнұсқаларды жүктей бастайды. Жүктеу үдерісін мерзімінен бұрын тоқтатпаңыз. Әйтпесе фотосуреттер мен бейнелердің бір бөлігі тек iCloud-та қалып, құрылғыда қолжетімсіз болуы мүмкін.

Неліктен iPhone құрылғысындағы фотосуреттер iCloud-қа жүктелмейді?

Кейде фотосуреттер мен бейнелерді бұлттық қоймаға жүктеу тоқтап қалуы немесе мүлде басталмауы мүмкін. Оның негізгі себептері:

• бұлттық қоймада бос орын қалмаған – тегін берілетін көлем 5 ГБ, оны iCloud+ жазылымы арқылы ұлғайтуға болады;
• интернет байланысы тұрақсыз – Wi-Fi желісіне қосылғаныңызды тексеріңіз немесе ұялы желі арқылы синхрондауға рұқсат беріңіз;
• қуатты үнемдеу режимі қосылған – батарея қуатын сақтау үшін телефон кейбір фондық үдерістерді уақытша тоқтатуы мүмкін;
• Apple есептік жазбасына қатысты ақау туындаған – кейде есептік жазбадан шығып, қайта кіру арқылы қызметтердің жұмысын қалпына келтіруге болады.

Смартфоныңызды ауыстырып, барлық деректі бұлттық қоймаға көшіргіңіз келе ме? Қазақстандағы Apple Premium Partner мәртебесіне ие iSpace мамандары қажетті жад көлемі бар жаңа құрылғыны таңдауға, Apple қызметтерін қосуға және деректерді синхрондауды баптауға көмектеседі. Сатып алу кезінде Trade In бағдарламасы мен бөліп төлеу мүмкіндігі де қолжетімді.

Жиі қойылатын сұрақтар

Құрылғы жадынан орын босату үшін барлық фотосуретті iCloud-қа жүктеуге бола ма?

Иә. «iCloud фотосуреттері» функциясын қосып, «iPhone жадын оңтайландыру» параметрін таңдаңыз. Толық өлшемді файлдар бұлттық қоймада сақталады, ал смартфонда олардың аз орын алатын нұсқалары қалады.

Бұлттық қоймадағы фотосуреттерді интернетке қосылмай ашуға бола ма?

Интернетке қосылмай-ақ құрылғыға алдын ала жүктелген фотосуреттер мен бейнелерді көруге болады. Егер құрылғы жадында фотосуреттің тек оңтайландырылған нұсқасы сақталса, түпнұсқасын ашу үшін интернет байланысы қажет.

Фотосуретті құрылғыда өңдесеңіз, өзгерістер бұлттық қоймада көрсетіле ме?

Иә. «iCloud фотосуреттері» функциясы қосулы болып, құрылғы интернетке жалғанса, барлық өзгеріс бұлттық қоймада және сол Apple есептік жазбасына кірген басқа құрылғыларда автоматты түрде көрсетіледі.

iCloud-тағы фотосуреттер қайда сақталады?

Фотосуреттер мен бейнелер сол Apple есептік жазбасына кірген барлық құрылғыдағы «Фотосуреттер» қолданбасында көрсетіледі. Оларды iCloud веб-сайты арқылы да ашуға болады.

Фотосуреттерді iCloud-қа жүктеу қанша уақыт алады?

Жүктеу ұзақтығы фотосуреттер мен бейнелердің жалпы көлеміне және интернет жылдамдығына байланысты. Бірнеше жүз фотосурет жылдам синхрондалуы мүмкін, ал бейнежазбалары көп үлкен жинақты жүктеуге бірнеше сағат кетуі ықтимал.

Сондай-ақ оқыңыз

iPhone-ға қанша жад қажет? Әртүрлі жад көлемдерін салыстырып, ең тиімді нұсқаны таңдадық

Siri-дің 10 пайдалы пәрмені: уақыт үнемдеу үшін iPhone-ға не айту керек

iPhone-да қолданбаларды жабу керек пе: пайдасы бар ма, әлде зияны бар ма?

Интернеттегі алаяқтық: оны қалай анықтауға және өзіңізді қалай қорғауға болады